【即收即拆】周秀娜挑手鈪送閨密 營造雙重驚喜
手鈪閨密驚喜周秀娜聖誕
無論係買禮物、送禮物定收禮物,總係令人開心又興奮。
周秀娜每年聖誕都會給閨密挑選別出心裁嘅禮物,今年都唔例外,佢揀咗三隻手鈪送好友,等對方戴住佢,就記住娜姐。娜姐除咗重視揀禮物,佢仲會再花心思重新包裝,等閨密拆開時,帶嚟雙重驚喜。娜姐於是準備咗一個靚嘅禮物盒,仲有一隻可愛聖誕鹿做裝飾,再加一張親手寫嘅心意卡,最後放入三隻手鈪,娜姐又童心未泯,把手鈪掛喺小鹿角上把玩。娜姐話期待看到閨密拆開時開心一幕,佢預演朋友拆盒閃出耀眼金光,佢搞笑用手遮擋,風騷鬼馬。問到娜姐點解揀手鈪送閨密?佢話:「我知閨密好貪靚,鍾意戴飾物,我哋平時會一齊行街同旅行,分享扮靚心得,我大概知道佢鍾意啲乜嘢,佢鍾意星星飾物,款式簡約,平時返工用得着。」
娜姐好享受揀禮物送友人過程:「我鍾意再花心思包裝,咁閨密收到,佢未拆開又會估吓裏面係乜,成個過程係好開心。我最享受揀禮物嘅過程,聖誕節好啱畀一個藉口去shopping,一路行,一邊諗邊個啱邊樣,呢個過程好enjoy。拆開又有金光射出嚟呀,我會叫朋友拆開時拍個video。」娜姐話聖誕節一定會約齊朋友返屋企開P,大家仲會玩交換禮物,即抽即拆,唔會等到Boxing Day,娜姐話:「交換禮物,好想知對方反應,我會即刻拆開,如果收到飾物,又靚嘅話,仲可以即刻戴。」
娜姐今年有意準備約20份聖誕禮物送家人同朋友,佢數數手指話大約花費5位數字:「都差唔多,揀禮物,我唔係睇價錢,只要啱朋友用就會買,我會留意吓佢啱唔啱用,同平時又鍾意啲乜嘢。」20位運兒當中,有男有女。娜姐送出聖誕禮物,當然也想收到友人心意,佢自爆鍾意收到飾物:「細細粒都得,唔使大大粒,唔使好朋友送大大粒嘅。」娜姐今年聖誕心願恨有拖拍,咁係咪期待未來真命天子送大大粒鑽飾?娜姐話:「呢啲佢識做,或者我自己買大大粒獎勵自己都得。」
撰文:劉敏
攝錄:郭賢興、廖達燊
珠寶提供:周生生
服裝提供:連卡佛
場地提供:Santé Wine Bar