【細個打過網球】咁都認得錯 Eason梳分界頭似張德培?
eason陳奕迅康堤張德培
陳奕迅(Eason)今日喺維園,以推廣大使身份出席「賽馬會樂動網球計劃」記者會,並與財政司司長曾俊華一齊擔任主禮嘉賓,Eason喺推廣片段入面話自己7歲已開始打網球,佢喺活動中就示範轉網球拍:「以前見到林子祥、張學友打網球,覺得好有型,所以我就去打網球。」
Eason透露現時放大假,所以生活習慣改變咗,佢話:「3、4年前,同Eric Kwok、谷德昭開始打羽毛球,網球都係呢個暑假先打番,因為左腳斷過十字韌帶,12年做咗手術。」有冇同囡囡康堤一齊打網球?Eason笑住話:「佢唔識打,公開講佢會好hurt,不過佢音樂同唱歌係好,但佢手長腳長腰長,會論盡啲,懶呀,似我,所以靜態啲會好態啲,佢有跟阿徐(徐濠縈)跑步,佢好自律。」Eason仲有跟黃佩霞學瑜伽。
講到Eason真係fit,有番輪廓,佢開心咁話:「係呀,其實我冇輕,都係170幾磅,以我高度,應該係150幾磅,我今年42歲,身體好似螺絲一樣會生銹,所以多鍛練會更加靈活。」提到佢7歲打網球,Eason笑住話:「我以前短髮,梳側邊界同孭住球袋,有啲人都認錯我係張德培,之後我都識咗佢。」Eason表示曾見過網球球星麥根萊、蘭度同艾保,仲講笑話麥根萊好招積。
就快開學日,有傳囡囡康堤去外國讀書,Eason好大反應話:「吓!點解我唔知,唔係,香港幾好丫,唔辛苦,但係難,不過難係好,因為係好學校,等佢大少少先,到我有能力先,去外國都想,見識吓世界,擴闊吓都好,例如去英國可以去博物館,又可以獨立,喺香港會依賴,等佢中三、 四,有自己朋友先。」
提到好友陳子聰早前因腸胃問題入院,問到現時情況?Eason指對方好似OK,但未知出院未。會唔會叫陳子聰一齊做運動?佢話:「佢應該未得,休息下先。」