【新增短片】
《城市論壇》今日抖暑後復播，討論雙學三子等人入獄後對青年嘅影響，新政府本來聲言要「大和解」，林鄭都話唔鍾意搞政治鬥爭，討論吓係咪咁樣就可以消除嘅社會對立，但當然主持蘇敬恆(人稱「蘇B」)都戴足頭盔，講明唔會討論單一法庭案件或者係法官判詞，唔係嘅話維園阿伯大媽激起上嚟，莫講話台上清一色的女嘉賓，可能連蘇B自己都驚。

不過八方有興趣嘅係台上嘅主持竟然仲係蘇B，話說今朝一開波，主持嘅開場白係：「大家好，我係蘇敬恆，暑假完咗喇，好高興又同大家見面，多謝大家繼續支持。」原來盛傳會出任政治助理嘅蘇B仲未埋班入閣，莫非真係過唔到「品格審查」？

本來預計蘇B等住入政府做份月入至少8萬、加薪近倍嘅筍工，有傳港台現時嘅資深女主播陳月慧已經密鑼緊鼓咁準備接替《城壇》主持嘅工作，依家情況點呢？睇嚟蘇B都仲係樂觀嘅，今日完咗《城壇》蘇B就笑咪咪同記者講：依家未有最新消息可以公佈，如有需要嘅時候，會有同事替補主持一職。

蘇B同大台主播吳璟儁一樣，盛傳分別會加入食物及衛生局同政制及內地事務局做政助，依家兩位後生傳媒人疑似雙雙卡住咗，兩個位都仲係懸空狀態。