與大賓架Ｎ吃晚飯，講起讀書時代選修通識課程，眉飛色舞，當年與同學上課，聽講師講馬克思主義，再睇吓《大公》、《文匯》、《人民日報》，愛國精神十分高漲，於是有人組織回國參觀團，向祖國工農兵學習。賓架Ｎ因事，冇去到，當時引以為憾，回國同學返嚟之後，喺學校教堂舉行學習總結滙報大會，賓架Ｎ當然出席。
賓架Ｎ話：「我記得好清楚，在場同學聽到人人感動，當一位同學報告喺上海某人民公社農場見到田上嘅番茄大過隻湯碗時，激動到幾乎眼淚都出埋，感激祖國嘅農業科技進步，中國農民大翻身，多謝共產黨，多謝毛主席領導，中國先至可以從半殖民半封建社會走向富強獨立……」

然後點呢？賓架Ｎfastforward去到一九七六年，四人幫垮台之後：「突然間知道，江青被捕，我哋成班人震晒，不知所措。後來有內地文章揭露文革笑話，提及上海從日本買入唔少溫室培養嘅大番茄、蔬果，精心擺放設於人民公社農田上，供境外遊客參觀，呃晒啲番鬼佬以及香港愛國學生……」
我等聽完，哈哈大笑，賓架Ｎ嘆一聲：「笑中有淚也！」有此經歷，唔怪得賓架Ｎ十分精明，手下寫報告，經常畀佢質問到口啞啞，冇得蒙混過關。大教授在座，亦有笑話講，佢話文革時期一位美國人韓丁，經常出入中國，喺美國以江青好友自傲，好多人請韓丁演講。四人幫倒台之日，韓丁剛好在美國一個午餐會演講，大讚老毛、江青對建設新中國之貢獻。講到一半，助手向佢遞紙仔，韓丁睇住張紙話：「經常有謠言詆毀江青，𠵱家居然傳到佢已經被捕，簡直荒謬，絕不可信。」午餐會之後，通訊社電視台紛紛報道四人幫垮台！呢位韓丁去咗邊？是否仍然在世？大家懶理，如此人物，只算係歷史長河中一個小丑。