103萬人上街「反送中」，換嚟政府一句如期恢復《逃犯條例》修例二讀辯論，激發市民佔路抗議，換來布袋彈、橡膠彈、催淚彈，仲被定性為暴徒，「光明正大」支持修例嘅建制派議員，繼噚日偷偷摸摸唔見人，今日順利返入立法會啦，但就一反常態，冇露面回應事件，反而化身鍵盤戰士，強烈譴責「暴力行動」。咁又係，喺Facebook講有咩好處？留言可以唔覆，又唔使唔答記者提問嘛。

唔少建制派喺主席梁君彥宣佈今日唔開會後鳥獸散，晏晝都有喺fb出post，當中民建聯主席李慧琼，對暴力行為予以最嚴厲嘅譴責，更擔心呢啲行為「殘害香港經濟及對國際商貿形象的毀滅性破壞」，對此深感焦慮、不安同難過。唔知琼子有冇睇吓各大外媒報道，人哋似乎關注和平示威特區懶理、警方濫權多啲喎！

今日返過立法會嘅工聯會麥美娟就發帖，話收到朋友訊息，心痛香港有「暴動」，而佢哋支持修例，所以叫佢行使權力去投票，佢話香港人可愛之處就係有獨立思考、有多元聲音，仲呼籲「熱愛這片土地，關愛我們的下一代」嘅人「和平理性地化解爭議」。唔……遊行俾人當透明、佔路衝突係暴力，大家可能要向麥美娟請教，點樣仲可以熱愛呢片土地嘞！

佢嘅黨友兼外號「醬爆」嘅陸頌雄就對噚日衝突有一番見解，佢轉貼示威者Telegram對策谷嘅群組管理員被捕報道，指有人叫人喺金鐘前線衝，自己就縮埋喺新界做總指揮，批評呢啲人係幕後玩家，佢仲話香港搞政治抗爭係門生意，只要前線源源不斷供應年輕人做死士、消耗品，呢盤低成本生意，就可以一直做落去。睇嚟搞「暴動」起家、當年有好多年輕人追隨行動嘅工聯會，真係別有一番心得！

昔日新聞：
電視辯論互叫熄咪 曾：你係撕裂2.0 林鄭：會順應民意辭職

【引渡惡法●懶人包】大律師公會逐點K.O.政府修例理由
【引渡惡法●懶人包】一文睇晒立會法律顧問7點質疑修例

-----------------------------
【新聞有價】6月17日起 繼續撐蘋果
http://bit.ly/2IJ24ZR