廖碧兒舊愛林忠豪於巴黎時間今日(10號)喺巴黎大皇宮出席「第27屆巴黎古董雙年展」,今次仲帶埋女友Susanna恩愛到場,原來今次林忠豪係為咗出席朋友喺羅馬舉行嘅婚禮,加上今次古董雙年展,請咗假10幾日,陪女友去歐洲shopping開心吓。
問到有報道指舊愛廖碧兒想急上岸,由黃長興做媒人,約咗Neway大少薛世恒相睇,林忠豪似乎有備而來,佢話:「都過咗咁耐,都想佢開心,想佢好,如果真嘅我會祝福佢。」覺唔覺得廖碧兒拜金?林忠豪就力撐對方話:「唔會,我覺得佢工作好認真,我係深深體會到,佢好努力做嘢,佢中文唔好,劇本嘅中文唔識會叫助手逐個音譯。拜唔拜金?邊個女仔唔想搵個人照顧?我o依家好開心,都想佢開心。」
同場仲有呂良偉同太太楊小娟,阿呂話今次專登請咗兩個禮拜假,陪太太歐遊,睇吓古董咁,小娟話:「巴黎係我哋結婚嘅地方,每次嚟親都會帶埋個仔,今次係12年嚟第一次兩個人嚟呢度。」阿呂就話帶埋囝囝同二人世界有唔同玩法,小娟就話同個仔嚟:「一切都係囝囝照顧返我轉頭,起碼佢英文叻過我。」