現年42歲嘅韓國「催淚天后」崔智友今日驚爆做人妻，佢今日低調嫁圈外男友，不過友姐就好低調，事前保密功夫做到足，就連公司都唔知佢結婚，認真低調到暈。

事實上友姐貴為韓流始祖嘅一份子，唔少都希望佢早日覓得真命天子，而韓國幾位女神始祖都先後成為人妻，好似《大長今》李英愛、《來自星星的你》全智賢、《天國的階梯》嘅情敵金泰希、去年連神劇《太陽的後裔》嘅宋慧喬都做埋人妻，0依家到友姐宣佈婚訊，自然令一班睇住《天國的階梯》、《藍色生死戀》長大嘅劇迷十分興奮，開心又一位女神告別單身。

不過睇睇現時年過35歲嘅女神級仲未做人妻，就似乎只剩下孫藝珍，現年36歲嘅孫藝珍出道19年，曾拍攝經典韓片《假如愛有天意》以及韓劇《夏日香氣》，喺香港都為人熟識，而孫藝珍近年傳來傳去嘅緋聞只得韓劇《鯊魚》拍檔金南佶，近日孫藝珍又忙於拍攝聽日開播嘅新劇《經常請吃飯的漂亮姐姐》，估計佢未有咁快宣佈好消息。

更多韓流，喺晒《娛果》
http://fb.com/appledailyent