【新增圖片】

快活谷這晚（21日）第四場四班1800米，勝出的是排10檔的9號馬「寶正寶」，呢匹方嘉柏賽駒匆出續配意大利騎師李寶利，由田草轉谷草加程跑1800米，留前鬥後取得連捷，今場單Win及組合獨贏A2分別派80.5及33元。

六歲馬「寶正寶」由林建岳阿媽余寶珠與王正宇聯名持有，上仗一洗長期不勝污名，初配李寶利前置爆冷贏田草1600米，影相氣走蔡約翰大熱門「勇闖者」開齋，呢次轉過嚟跑曾三度得亞軍的谷草1800米，結果「寶正寶」在李寶利胯下繼續反彈，沿途前置轉彎抄外叠蝕位，末段仍能增速脫穎而出連捷，亦令李寶利延續季尾旺氣。

咁啱今場跑第二又係蔡約翰的馬，此乃閘前落重飛着啡燈的杜利萊座騎「勁豐裕」，蔡約翰亦因此只能維持今第91場頭馬，仲未破到香港紀錄。

方嘉柏幽默笑言「寶正寶」之前跑了38仗不勝，處女身份不知勝利的喜悦，到上場終於取勝，成功破處，小方笑言處女馬初嘗禁果後，明白箇中興奮，遂越跑越好持續反彈，是他樂見的事情。

柏寶今場騎蘇偉賢馬房3.2倍大熱「皇帝誥令」只得第5，個人自銷假回歸本港以來未贏過馬，今場二至四名由「勁豐裕」、「馬狀元」及「欣喜欣喜」順序瓜分，四重彩派八萬三千幾。