「為何要我愛上你...一天不一起...都當作在倒數別離」......連詩雅聽日就29歲生日，今日收到一份殘忍嘅「生日禮物」，就係舊愛被爆新戀情，百億闊少嘅新歡......仲要係阿Sa(蔡卓妍)。連詩雅呢個生日，會唔會過得唔開心呢!?

連詩雅今年2月同「麻將館大王」太子爺石恆聰(Anthony)分手，估唔到太子爺Anthony過咗兩個月，感情即翻開新一頁，同34歲Twins成員阿Sa(蔡卓妍)拍拖，難怪阿Sa近排春風滿面，喺Ig大晒甜美，原來處於熱戀期，更被影到早前兩度上Anthony位於畢架山嘅獨立屋過夜( 新聞連結： http://bit.ly/2to3HXk )，阿Sa亦未有否認戀情，只係話o依家好開心!

至於，「另一女主角」連詩雅傍晚6點半左右，喺中環出席M8手機發佈會，感覺幾輕鬆，似乎有備而來，被問前度Anthony同阿Sa拍拖，連詩雅就話：「今日都有見到報道，我哋都分開咗咁耐，佢同任何人一齊都唔係好關我事，關於佢嘅事，我今日講完之後就唔會再回應，將來佢有啲乜嘢動向，我都會祝福佢嘅。」

被問同Anthony分咗手幾耐?連詩雅竟然話已經唔記得：「入咗行之後都好忙，啲嘢都冇記住!」講到有指佢死纏Anthony，連詩雅就話：「呢啲係虛構嘅報道，得啖笑，唔係事實嘅嘢，唔回應!」有冇打算復合，連詩雅講：「呢一刻自己好開心，公司啲同事仲話我係筍盤。」

Anthony同阿Sa拍拖會唔會祝福?連詩雅即話：「梗係祝福喇!大家都認識咗咁多年，將來佢做啲咩都會祝福。」問到覺得佢哋襯唔襯?連詩雅話：「靚仔靚女梗係襯!」連詩雅又話已經對Anthony嘅嘢冇咩感覺，不過只要係認識嘅朋友都會戥對方開心。

講到同場嘅馬天佑係阿Sa同Anthony嘅「紅娘」見面覺唔覺得尷尬?連詩雅就反問：「點解呀!從來都冇覺得尷尬，我哋(同Anthony)分咗手咁耐，都冇乜特別感覺喇!我同馬天佑都有一班認識嘅common friend。」

咁o依家呢一刻仲愛唔愛Anthony?連詩雅猶疑咗幾秒再答：「點講呢?朋友囉!好少搵嘅朋友，自己真係好忙，有時間都想見一下中學嘅女仔朋友。」

有報道指佢唔定性先被Anthony飛?連詩雅再次話虛構嘅嘢都係唔回應：「身邊嘅朋友都知道我係咩人，覺得呢件事好搞笑囉!」講到佢聽日生日就大一歲，連詩雅話：「係呀!年紀越大就覺得唔同嘅經歷多咗，睇嘅嘢多咗，同埋知道有咩人係永遠喺身邊支持。」連詩雅就話希望生日有艷遇，自己想專注工作。

不過，連詩雅有啲前言不對後語，一時話分咗手後冇聯絡，之後又話少聯絡!