每逢選舉前夕，市面一定流出好多消息，有時係自己陣營放風造勢，更多時都係敵軍爆料，擾亂軍心，唔知以下呢一單，大家又點睇？最近政圈有傳，卸任香港警察隊員佐級協會主席嘅陳祖光，明年底擬參加區議會選舉；成日喺鏡頭前捍衛警隊權益嘅陳祖光，政治上係素人一名，大家都會奇怪，點解傳佢突然踏上從政路？有政界話，聽聞「有人」睇中陳嘅警隊背景，推薦對方到九龍東嘅紀律部隊宿舍嘅選區出戰。

空穴來風，點會無因？八方搵嚟當事人陳祖光親自解畫，佢證實聽過有消息流傳：「『有人』話：『阿祖得㗎喎，不如叫佢出嚟選」，但佢話流傳還流傳，事實係直至呢一刻，都冇人邀請過佢出戰喎，而最實際嘅問題係，佢明年3月先至退休，坦言「我連退休後做乜都未諗」，所以而家呢個階段，完全無任何決定。

任內經歷佔中、旺角騷亂等事件嘅陳祖光，較為人熟悉嘅係，曾經為「七警案」舉辦撐警會員大會，又指七警案同朱經緯案，影響警隊士氣。佢曾經同官員會面，討論警員執勤時動武，係咪可以豁免刑責，都惹嚟唔少爭議。陳今年5月結束6年任期，正式卸任協會主席。如果要數同紀律部隊較啱key嘅政黨，相信非由前保安局局長葉劉淑儀領導嘅新民黨莫屬，唔知葉劉覺得陳祖光，係咪可造之材？

相關新聞：【差佬晒馬】陳祖光唔怕集體爆粗損形象：秩序好證警隊高質
相關新聞：斥《有種罪犯叫休班警》抹黑同袍 陳祖光：聖人也犯錯