以「社區驚喜」為參選口號嘅楊雪盈，2015年擊敗新民黨對手當選灣仔區議會大坑區議員後，經過三年努力，噚日終於為一直等待區內增設自動櫃員機（ATM）等到頸都長嘅大坑居民帶來「驚喜」，皆因大坑終於喺浣紗街附近增設咗首部ATM！

一直跟進區內ATM問題嘅楊雪盈，噚日收到電郵得悉大坑ATM「開張」後，即時衝落街撳咗兩次錢同存錢，話睇到大坑居民多年來嘅願望終於成真，真係好開心。楊雪盈噚日撳完錢離開後，即時遇見大坑街坊，對方都對終於有ATM用表現興奮，話要即時「跟隊」試用新機撳錢。

楊雪盈撳完錢後就話，對於選管會最終無接納大坑居民意見，將希雲街5幢大廈嘅居民劃出佢選區感到好遺憾，認為選管會完全無考慮社區完整性，做法非常唔合理，佢表明未來會繼續跟進希雲街議題，希望為噚日部ATM誕生而感到開心的大坑居民，嚟緊可以搵多個朋友登記做選民，因為社區同政治，關係好密切㗎。