當年今日

傳千萬投身小小超旗下
馮仁昭四圍超:古仔做電盈一哥 蕭正楠借歪

蘋果日報 2002/09/29 00:00


古天樂自從約滿華星之後,已經有一段時間冇出過唱片,早排佢同記者講話自己簽咗間唱片公司,𠵱家揀緊歌,但就冇講到係邊間公司。
馮仁昭八到古仔簽嘅,就係金牌經理人李進加入冇耐、由小小超李澤楷做老闆嘅唱片公司musicnation,而且出手都幾闊綽,用咗八位數字簽咗古仔兩年。

老闆親自拍板
到時古仔就會同蕭正楠同一間公司,蕭正楠被稱為「電盈之子」,咁古仔當然係「電盈一哥」啦,聽講今次古仔簽約,小小超都有份拍板。
馮仁昭同李進求證呢件事,佢就唔肯正面回應,猛耍太極話所有有潛質嘅歌手,佢哋公司都想簽,不過佢都話古仔係一個有潛質嘅歌手,唔知咁算唔算係默認呢?而古仔就話𠵱家唔可以講簽咗邊間住,要適當嘅時候先至公布喎。

譚小環周身HelloKitty
卡通人物HelloKitty喺全世界都咁受女士歡迎,唔少香港藝人都鍾意買佢嘅精品,譚小環就係其中一位HelloKitty迷喇,所以小環身邊嘅手提電話繩、鎖匙扣、橡筋圈都係呢個公仔。
小環話:「我小學已經開始鍾意HelloKitty,平均每個月會花大約二千蚊掃貨,總之身邊實有HelloKitty,有時我都覺得好過份。」

朱茵𢱑銀唔幫黃凱芹
朱茵噚日去港台出席「電視之旅同樂日」,佢話因為接咗個廣告,所以唔可以做黃凱芹演唱會嘅嘉賓,阿茵話:「我已經一心一意諗住第一次處女下海啦,好可惜時間上就唔到。」
記者問佢嘅「第一次」會唔會獻畀男朋友?阿茵即時話:「我怕佢踢我落台呀,我寧願做觀眾欣賞佢個show喇,因為佢一上台就會霸晒成個舞台,我根本就分唔到一毫米,加上我都唔想失禮呀。」
玉女扮儍婆博上位
玉女歌手出道時,佢個經理人好睇佢,起初約雜誌做訪問,非封面唔接,點知做到𠵱家,宣傳費使唔少,但一路都冇起色,唱歌又唔見有乜進步,要上位睇怕重要捱一段好長嘅日子。佢個經理人於是乎採取放棄態度,轉會都唔照住佢。
呢位玉女歌手近來拍咗部垃圾戲扮癲婆,佢竟然好入戲,出席各大小公開場合都無喇喇笑一餐,重係笑聲震天嗰隻,唔知佢係入戲得滯抽離唔到儍鬼咗,定係為咗自救,實行改走大笑姑婆路線,博觀眾好感呢?

泰國鬼片長髮女鬼高高掛
泰國新片《鬼債》喺旺角百老匯戲院外面嘅廣告牌度吊咗個長髮女鬼公仔,個長髮女鬼重着住紅色長裙,非常搶眼。呢招應該好見效,因為每個途人行過都必定會望吓,不過就真係幾得人驚。唔知遲啲會唔會俾人投訴太恐怖,搞到唔掛得呢?

黎思嘉擔心媽媽病況
黎思嘉同饒林紅噚日去旺角新世紀廣場宣傳亞視播映嘅劇集《大清藥王》。
黎思嘉話最近好擔心媽咪嘅病情,佢話:「我呢幾日都瞓得唔好,因為擔心媽咪入院嘅事,佢突然間右邊耳仔聽唔到嘢,醫生話係血管閉塞,冇得做手術,好番嘅機會好微,可能以後聽唔到嘢。呢幾日我都一早起身煲湯同煲粥畀媽咪飲,我重擔心到喊。其實我媽咪今年犯太歲,我曾經幫媽咪去過黃大仙拜神求籤,結果係中下籤。」
生電精短訊冧上海商人
三色台有位當紅花旦,佢樣子標致,但經常被人話係「生電精」,邊個男人接近親佢都幾乎無一幸免。呢位「生電精」嘅冧仔絕招,除咗十足嗲功之外,佢重好喜歡用手提電話send短訊。
試過有一次,「生電精」喺上海識咗一班做生意嘅商人,就四圍問人攞卡片,趁住唔使入廠嘅空檔,「生電精」即刻不停send短訊話掛住人。咁啱得咁蹺,其中一位生意人個女朋友係藝人,佢見到男友呢啲名副其實嘅「電」訊,都咪話唔眼火爆。

阿Yu未出碟想攞新人獎
趙頌茹(阿Yu)噚日去銅鑼灣出席簽名會,呢個係阿Yu入行後第一個個人簽名會,佢話希望出碟之後有一個大啲嘅簽名會,咁就可以簽名喺自己隻CD度。
阿Yu嘅唱片應該會喺下月底推出,佢話咁遲先出碟係因為慢功出細貨,重話肯定自己可以趕得切角逐新人獎,好心急想睇吓自己嘅成績喎!

啤梨無辜被推上位
劉德華前日四十一歲生日,但係佢正喺海外度假,新城娛樂台就喺嗰日安排DJ葉文輝(啤梨)帶一班「雙失」青年做義工。
因為呢次活動,啤梨被指借華仔上位,新城節目總監朱明銳噚日同馮仁昭講:「啤梨喺呢件事上無辜,因為都係公司派佢做呢個job。而且呢次活動,新城有事先知會華仔,佢都話好想幫吓啲雙失青年。」
江欣燕考慮買樓收租
江欣燕噚日去深井碧堤半島睇樓,原來佢想買一個面積約六百呎、賣二百萬左右嘅單位。馮仁昭噚日打電話畀欣欣,佢話:「係呀,我見𠵱家零首期,咪去睇吓啲單位啱唔啱心水囉。」不過欣欣話最近樓巿都未係咁好,就算佢入貨都一定唔係用嚟炒,多數租畀人。