近幾次賽事嘅賽後焦點都離唔開莫雷拉，好幾隻頂頭大熱好似「激賞」、「金碧輝煌」同「精算風暴」嘅推騎留放，都令馬迷有好大問號。大熱門倒灶涉及巨額投注，莫雷拉一而再表現唔出佢應有水準同判斷，馬迷自然對佢嘅鬥志有疑問，事實唔少馬迷確對莫雷拉非常反感，甚至想佢早走早着。

好多馬迷都睇到，莫雷拉今季嘅整體表現差咗好多，最難明係一啲陣上走位嘅判斷，有得放頭就走去留住隻馬，讓畀其他對手放頭，好似剛戰「精算風暴」咁；而有得貼欄守好位又偏偏移出外疊浪費腳程，類似鏡頭經常出現，家陣嘅莫雷拉已經唔係過去大家熟悉嘅雷神，完全冇咗以往場場搏盡嘅鮮明鬥志。

上次谷草夜馬莫雷拉騎「金碧輝煌」，賽後唔少馬評人同馬迷對佢早段放棄領放有好大疑問，競賽小組其後亦補鑊召莫雷拉去解釋跑法。當然小組事後問話係冇用嘅，騎師總可以自圓其說，小組亦好難有足夠理據去拒絕接納騎法嘅解釋，講得直接啲，就算騎法擺明話判斷錯誤跑錯馬，唔見得小組可以引用乜嘢賽事規例罰騎師，現實就係小組都對騎師冇符。

今晚(28日)「金碧輝煌」匆匆再出，繼續莫雷拉騎，仲要抽到個非常好嘅二檔，到底今次莫雷拉放定唔放，已經考起馬迷。同場有「勇者勝」同「自由旺」呢啲硬淨對手，「金碧輝煌」肯定唔會好似上次咁熱到不足兩倍，相信唔少馬迷都想睇吓莫雷拉今場點跑。

早前莫雷拉停賽兩期，好多馬迷話啲馬中到又好分，有莫雷拉反而買又唔係飛又唔係。今晚潘頓、田泰安同郭能都停賽，肯定又熱晒喺莫雷拉身上，喺馬場太過熱情盲目捧人，長遠計都係有蝕冇賺。

阿Joe