阿仙奴中場伊度「出口術」成功，講緊係佢早排話對於巴西國家隊唔用佢感到意興闌珊，或者考慮利用國際足協新例，改為代表英格蘭上陣；結果巴西國家隊呢輪選人，真係將佢召入伍。
就咁睇好似伊度係贏家，不過亦可能係巴西國家隊嘅謀略，選佢入伍之後畀佢代表巴西踢一場半場友賽，之後再用佢與否已是後話；最緊要佢唔能夠再代表其他國家隊，既可以消減國際足協又要為球員轉國籍比賽問題嘅煩惱，又可叫佢收口，呢招都夠絕囉！
但計我求大俠話齋，伊度即使好可能只係國家隊過客，話晒都係代表緊世界冠軍隊巴西，慢吓手真係時來運到有好表現，咁就「雙贏」嘞！

難得坐正都唔爭氣科倫踢得好「屎」
曼聯件烏拉圭前鋒科倫，前晚超聯難得正選上陣鬥弱旅李斯特城，可惜，衰啲講真係踢得好「屎」。比賽中佢重曾經同基斯坦奴爭射罰球，雖然畀佢爭贏咗，但就連人牆都射唔過，難怪全場都打得唔錯嘅基斯坦奴，當時行開讓畀呢位師兄主射，顯得好唔忿氣咁啦！

陪降唔會場場踢恩斯妙語講退休
狼隊老將恩斯一直都有計劃季後退休，但係呢位三十六歲中場硬漢又改變初衷，想繼續踢落去。之不過，恩斯答記者退休問題時，個答案都幾妙，佢話下季再喺球場馳騁唔緊要，但要踢足四十六場聯賽就有難度，言下之意，恩斯已經對護級成功抱放棄念頭，諗定下季再戰英甲。