無綫第27期藝訓班出身嘅黃匡翹日前喺facebook宣佈「我結婚了」！可能大家對佢印象唔係太深，其實佢喺《愛回家》裏面，先後扮演過求職者（571集）、女侍應（616集）、翹（624集）、學生（742集）等等唔同角色，仲有喺《東坡家事》入面，飾演黃心穎妹仔春花，心穎BB都有留言恭賀佢結婚。

25歲嘅黃匡翹同比佢大13年、任職CreativeDirector嘅男友JesperLau喺上月12日已經簽紙註冊，上周日同至愛親友去咗泰國布吉補辦喜宴，匡翹開心到忍唔住流淚，佢今日喺電話度話好開心，邀請咗同期訓練班幾個女仔做姊妹，整個婚禮過程既開心又浪漫，佢話：「我哋拍咗拖5年，其實自己一直好心急嫁人，去年7月我哋去北海道旅行，一晚佢帶我去水之教堂，突然全場燈光關晒，仲播音樂向我求婚，我梗係應承。」

婚禮籌備近8個月，花了逾百萬的使費，但匡翹覺得好值得，問到幾時生B？佢笑話：「順其自然，我都想有呀。」