當年今日

樂香園:王維基有排都未收皮 - 海迪

蘋果日報 2013/11/19 00:00


平日睇新聞,不經意見到某啲立法會議員喺度派膠,本來已唔識動氣,麻木晒,但臨近交稅季節,神經可能特別敏感,見到有人大大聲叫人收皮,真係好難唔反白眼。
王維基嘅香港電視(1137)上周公佈業績,財務狀況只可用3個字形容:相當穩健。表面上睇,淨現金好似半年少咗7億咁,但其實佢同時多咗5億元金融資產,即真正使咗嘅現金,只有約2億幾元。相比起公司手持資產嚟睇,仲係「使得起」。
香港電視截至8月底,總共投資嘅金融資產就有19.6億元,定期存款連現金有6.9億元,就算扣埋銀行負債5.32億元,可動用或者套現的資產,總共有成21.2億元。
香港電視冇透露佢買咗乜金融資產,不過相信都係一啲債券同大價股居多。而舊年呢批金融資產嘅投資回報其實唔差,股票連同債券買賣加上股息收入,總共就有6,700萬元。連埋現金本身嘅存款息,仲有少少物業收租咁,整體財務收入有1.29億元,完全夠cover貸款利息有凸。
當然,金融資產可升可跌,但斷估以一個夠diversified嘅portfolio嚟講,潛在跌幅多極有限。王維基有排都唔會收皮,反而發噏風冇料到嘅人,自己小心啲。

海迪
足本收睇《亂噏24》x 楊千嬅;影帝張家輝接力上陣!
周一至周五《亂噏24》約定你: http://bit.ly/appletalk24