鄧梓峰同鄧萃雯今日喺尖沙嘴朗廷酒店出席日本命力20週年酒會，雯女代言骨骼強健素，佢並唔擔心遇上骨骼疏鬆問題，一直有保養同飲食方面控制，幾年前開始養生飲食清淡。雯女話：「女演員畢生減肥，以前自己獨居細個唔懂事，減肥亂食嘢，直至三十歲打後就尋求中醫，得知年輕時搞壞身子，o依家會食粗糧五谷，誡食冰冷食物，唔好以為食沙律菜就健康。」

會唔會擔心女性更年期關口？雯女話：「我係基督徒，鼓勵任何嘢都要面對，未到30、40已及早認知，每個關口階段都會提早認識，我好勇於擁抱佢。」

雯女現為王祖藍旗下藝人，大家已合作一段時間，雯女：「祖藍強項係綜藝，唔係完全適合我，合作咗一段時間我發現自己唔係綜藝卡，又唔想乜嘢都畀人知，例如食乜玩乜，互聯網我都只係得微博，祖藍都知我係一個鍾意拍劇嘅人，當初只係一個合作，我哋並冇簽定合約年期，佢畀咗個好好條件我去感受國內市場。」雯女早前曾上大陸節目真人騷唱歌被網民點讚，雯女話：「要揀節目，要應付到先會做，我呢一個人生階段唔會拼搏，要挑戰自己考驗自己三十幾歲時候喺無綫已經做過晒。」還記得去年台慶雯女喺幕前表示有意回巢拍劇，問佢進度如何？雯女話：「陳寶華會返無綫寫劇本，之前本來講過會度身訂造一個劇本，我都好期待廣東話劇本好耐。」