莊思明(Lisa)、陳展鵬同曾志偉，今日傍晚喺銅鑼灣時代廣場為一間首飾品牌出席開幕剪綵活動，志偉剪綵儀式後，就匆匆離開。

Lisa今日被《蘋果》讀者爆料，指同男朋友楊明現身相思灣睇樓，佢話 ：「其實係大家想搵一個地方試下一齊住，兩個人都已經對呢樣野有共識。」佢話揀清水灣係想遷就男友住比較近公司。問到搬出去住屋企人或者家姐會唔會反對？佢話：「家姐都唔知幾想我搬出去住，佢可以一個人住晒間屋，而且我隻狗都唔鍾意佢，我搬出去就會帶埋隻狗走。」Lisa話雖然同男友依家未算同居，但有時都會喺對方屋企過夜。對日後嘅同居生活，佢就表示唔擔心：「我哋兩個都係遇到問題會攤出嚟講，唔會擺喺心。」咁會唔會擔心可能日後家務上嘅分配會起爭執？佢話：「我都唔奢望佢會做，因為佢拍戲返到嚟都唔得閒。」Lisa又話其實o依家都仲未搵定地方，只係一路有啱嘅就去睇，暫冇一個時間表話要幾時搬出去。

另外，陳展鵬就問到會唔會趁今日喺現場，揀啲手飾送畀女友單文柔，佢話：「可能帶佢嚟睇好啲，我揀未必啱佢心水。」咁會唔會考慮著情侶裝或者買情侶首飾？佢話：「我覺得都可以嘅都幾Sweet，有時去旅行嘅話都可以，如果套衫啲Pattern一模一樣嘅就好似小朋友咁，反而有啲情侶裝款係顏色同Pattern係有啲相似嘅其實係幾好。」