韓國綜藝節目《Happy Together 3》噚日播出新一集，當中邀得曾是一代女團Baby V.O.X嘅36歲成員簡美妍做嘉賓，佢喺節目上大爆當年受到黑心粉絲嘅攻擊。

Baby V.O.X當年人氣爆燈，韓劇《咖啡王子》女星尹恩惠亦都係其中一位成員，簡美妍當年傻大姐形象深入民心，因唱功了得而獲粉絲歡迎。但人紅就自然多是非，佢亦受到黑粉攻擊，更因而成為新聞人物。簡美妍重提當年事件，表示：「當時收到冇眼睛嘅相片，仲有對方威脅要殺死我嘅血書，收到時我真係好害怕，總覺得呢個人會真係會嚟搵我。」

簡美妍話當時針對嘅唔係佢一個人，其他成員都受到牽連，仲大爆尹恩惠都因為咁，被帶沙粒嘅水槍射眼睛，險些搞到失明，簡美妍話：「嗰時啲水槍係衝着我而來，尹恩惠無辜代我受咗一槍。」

而受到黑粉攻擊令到簡美妍變得小心翼翼，唔敢亂講嘢，甚至唔敢現身公開場合。事隔咁多年，當年攻擊佢嘅黑粉都已長大成人，仲有好多已結婚生B，佢話會收到當年嘅黑粉會傳短訊畀佢為以前事件道歉，簡美妍仲自嘲話睇返以前嘅片段，應該係自己嘅言行有問題先會受攻擊。

更多韓流，喺晒《娛果》
http://fb.com/appledailyent