張敬軒今日喺商台宣傳新碟，軒仔話張碟其實出咗一段時間，因為要做演唱會，宣傳就遲咗，好彩有新歌派台，對年底都有信心。

講到有周刊話陳奕迅、容祖兒同埋李克勤，今年唔再出席頒獎禮，覺得冇乜意思，軒仔話有聽記者講過，佢話：「其實我覺得係好意，佢哋係每一年嘅大贏家，到某一年比啲機會我哋後浪，老實講我哋做咗幾個頒獎禮記者會，得我哋呢啲坐喺前面，個心唔係咁踏實，有佢哋喺度，個心會定好多，場面會好睇好多，我哋做後輩好需要佢哋帶住我哋。」

軒仔話唔知係咪市道問題，呢代風氣冇佢哋咁成氣候，認受性同佢哋比較，喺觀眾心目中仲有距離，佢話:「我個人好希望佢哋繼續出席，觀眾開心好多。」覺唔覺冇咗佢哋會失色？軒仔話：「係o架。」問佢會唔會問下祖兒去唔去？佢話：「祖兒年底好似忙演唱會走埠，其實每年頒獎禮都有啲尷尬，因為係搵食嘅黃金檔期。」

另外，軒仔話好感激舊老闆Duncan（環球高層黃劍濤），因為佢啲舊歌版權好難傾，多謝佢幫佢傾番，0依家演唱會DVD可以順利推出，還咗自己一直心願。