韓國人氣組合JYJ成員Hero噚晚單拖喺上海開騷，同5,000個fans過咗一個開心嘅晚上。其中一part係Hero要着起圍裙整嘢食，佢揀咗整韓國好興嘅拉面炒年糕，鍾意食辣嘅佢仲將所有辣椒醬放晒落去，點知佢試味o個陣自己都嗌辣，但佢之後照餵主持人同粉絲食，真係靠害呀！主持人辣到幾乎講唔到嘢，但依然讚好食，笑到Hero癲咗。Hero又揀咗男粉絲上台抱抱，而全場粉絲亦舉起布條為Hero打氣，令Hero充滿驚喜。

忙完上海一站，Hero今個禮拜日24號就會殺到嚟香港，喺會展開騷。粉絲們準備喇！



「第八屆金話梅電影選舉」又嚟喇。今年除港產片有獎攞，仲增設「最爛合拍片」獎。栢芝憑四套電影入圍「最爛女主角」，應該冇得輸。大家快快投票啦，結果將於4月12日在《蘋果》娛樂版揭曉。

公投網址： http://facebook.com/AppleDailyGoldenPlum