憑韓劇《來自星星的你》飾演「千頌伊」細佬而為人熟悉嘅安宰賢，同女星具惠善因拍劇而撻着，兩人更於本月21號成婚。婚禮當日兩人除咗早上現身醫院捐贈婚禮費用外，之後安宰賢同具惠善就兩家人食飯以代替婚禮。

由於飯聚係非公開形式進行，一眾媒體唔可能入去採訪，不過呢對新婚夫婦都好識做，老婆具惠善透過所屬嘅YG事務所向媒體公開當日飯聚嘅相。當日飯聚於首爾鐘路區某餐廳舉行，飯聚嘅氣氛好融洽咁，睇嚟兩家嘅父母都好滿意自己嘅兒媳同女婿。安宰賢同具惠善不時深情對望，而且安宰賢仲十分體貼咁照顧老婆仔，真係Sweet到爆！