睇完新澤控股（095）嘅中期業績報告，發覺有一兩個point，雖未必可以列入健力士大全，但都應該係一個紀錄。
新澤係內地房地產公司，規模唔大，但半年營業額只得350萬元，少到咁樣，以內地房地產公司而言，應該係一個紀錄！另外，公司管理層討論及分析一文中嘅業務回顧，只得5行，共164字，夠晒精簡；仲有，業績報告中冇前景同展望，亦係少有。
雖然係咁，新澤並唔係一家唔好嘅公司，只不過期內實在「冇嘢好講」（中期報告可以簡單啲），管理層亦冇天南地北咁去拉扯鋪砌，實事求是。
睇番盤數，06年（12月年結）上半年，營業額352萬元，減92.4%；虧蝕784萬元，去年同期則獲利2453萬元，每股虧蝕1仙，不派中期息，期內應無發展物業收益入賬。
新澤業務基地在蘇州，現時土儲約10萬平方米，錦昌苑在今年4月開售，共212個單位，已售大部份，套現1.5億元，下半年可竣工交付並入賬，預計全部售出收益達2億元。另一項目錦悅苑有360個單位，今年11月動工，07年可推售並入賬。
集團專注經營中高檔小品房市場，除蘇州外，長遠將集中開拓江蘇省其他城市，下一個目標係無錫及南京，計劃再增加10萬平方米土儲。集團已參與發展南京市「舊商業街」項目，總投資1億元，佔21.6%權益。另外，透過聯營公司持有北京亮馬河大廈30%權益，上半年提供盈利847萬元。

新澤去年12月發售1.68億股上市，售價0.58元，今年2月中推介時股價0.75元，4月初升越1元，現時又回到0.62元，又係另一次低吸機會。上月底，有基金以3900萬元認購新澤6500萬股（佔9.11%），及以3120萬元入股蘇州地皮40%權益，新澤「晒士」細，市值僅4億元，有基金護航，揸中長線，諗得過。
郭兆誠