呢對波鞋來頭一啲都唔細,唔少波鞋迷都想收藏,由於係限量版,一對原價2,000蚊左右炒到成萬幾二萬蚊,Adrian當然就有齊三隻色啦。
至於佢嚟緊想收藏乜呢?原來係來自丹麥、有「現代家具之父」之稱嘅Kaare Klint喺1932年設計嘅一張單人椅,聞說係用上極罕材料製成,本身已經係件藝術品。
除咗藝術,Adrian亦有貼地一面。佢每日必備用品,除咗係一條圍巾用嚟擋風、一部tablet同埋長途機時可以閱讀嘅一堆notes之外,就係一支潤唇膏。咁又係嘅,佢成日周圍飛,機上咁乾,當然要支潤唇膏傍身,佢用緊紐約品牌Malin+Goetz嘅潤唇膏,一支只係100蚊。