南早集團旗下博益同一本堂失驚無神執笠，出版過嘅書，又冇話交番版權畀作者，幾十個作者恍如無主孤魂，以前嘔心瀝血寫落嘅作品，就好似失散棄嬰咁，跪都跪唔返。呢班文化苦主當中，包括立法會議員劉慧卿。
博益三年前幫卿姐出版過一部《卿描淡寫》，卿姐話咁耐以來收過兩張支票，至於部書賣成點？剩番幾多本，博益從來冇交代。卿姐最不滿係博益話會銷毀賣剩嘅書，咁樣好唔尊重香港嘅文化遺產。所以佢已經決定聯同苦主何文匯、李誠、關之義、伍諾韻等作者，向南早集團主席郭孔演發出公開信，要佢坐低同作者三口六面講清楚，還作者一個公道。