【韓流】孫藝珍賀玄彬36歲牛一 趙寅成淪為光洙經理人成熱話
趙寅成安市城
【新增《談判》內容及圖片】
由韓國型男趙寅成、南柱赫及雪炫嘅215億韓圜(約1.5億港元)大製作新片《安市城》,上周三公映後連日來都有好成績,就算對撼玄彬、孫藝珍主演嘅《談判》及曹承佑、池晟主演嘅《明堂》對撼,都力壓兩齣新片,Keep住成為單日票房冠軍。
適逢中秋佳節,《安市城》票房亦節節上升,上映僅4日已得100萬人次紀錄,而噚日票房更突破200萬人次,走勢相當凌厲,一眾演員都有上載新照賀新片破200萬人次。
至於由玄彬和孫藝珍主演嘅《談判》就喺韓國時間今日下午3時左右累計觀影人次成功突破100萬人次,電影製作方即公開兩位主角手捧住松年糕嘅照片,賀電影破100萬人次。而《明堂》已於噚日突破百萬人次。適逢今日係玄彬36歲牛一,孫藝珍亦即喺Instagram晒自己為玄彬慶祝生日片段,兩人配上app拍片,顯得好可愛。
另外,近日趙寅成同好友李光洙都成為微博嘅熱搜人物,起因係因為有大陸網民就上載光洙和趙寅成嘅合照,但該名網民就有眼不識泰山, 以為趙寅成係光洙嘅經理人,仲大讚光洙身旁嘅經理人竟然比光洙仲靚仔,其他網民一睇就知所謂經理人擺明就係趙寅成,即時笑爆嘴,亦慨嘆該名網民竟然連男神都認錯。
精選韓流,喺晒《娛果》
http://fb.com/appledailyent