經營環境未見改善，唔少公司都發盈警，但唔係隻隻盈警股都冇運行，好似航空同航運股，憧憬最壞情況已過，股價齊齊起飛。信義玻璃（868）上周四發盈警，翌日低開近8%，但不斷有買盤吸納，埋單跌唔夠1%，值得憧憬。
信義表示，由於首季浮法玻璃及太陽能玻璃售價回落，預期上半年盈利按年倒退四成。以信義去年上半年賺8.42億銀計，即今年上半年賺5.05億銀，雖然按年計盈利顯著回落，但比起去年下半年則增長近兩成，假盈警味道甚濃。根據中國玻璃信息網資料顯示，整體玻璃價格有見底回升迹象。保守估計，信義下半年盈利較上半年再有兩成增長，年度化市盈率約13倍，雖然唔算便宜，但絕對可以接受。信義主席李賢義亦睇好公司前景，上月底斥資逾千萬掃貨，平均價4.10元。信義上周五收報3.96元，戰友可候3.80元水平吸納，短線目標4.10元，跌穿3.68元上周低位就閃人。

唐牛