外圍股市造好，港股繼續反彈，內地股市轉強，恒指升幅擴大，再彈292點，報收23121。
現貨成交縮減，只有781億，但無礙港股升勢，技術上恒指喺23300至23500區域至會有較大阻力，一舉破關有難度，但係花旗同內地股市如果唔大幅跌返轉頭，恒指有機會喺阻力位前橫行，到時亦有利炒個別。
內銀股升勢可持續，但本地銀行業績期開始，盈利料有驚喜，會係支撐港股嘅另一動力。
中鋁C輪23004：中鋁（2600）報收7.74元，升4.5%。股價上禮拜下試50日線之後守穩，噚日掉頭炒高升上10日及20日線樓上，睇走勢好大機會試8元，成交配合嘅話，可望破關推向8.40元，買少少C輪23004博吓。
隻輪現價9.5仙，2011年6月22日到期，行使價7.38元，溢價7.6%，引伸波幅43.8%，槓桿率8.2倍（有效5倍），正股升上8.40元，23004睇14仙，升幅近5成，正股跌穿7.40元就沽咗隻輪。
俊樺