PSY最近熱爆康城影展,見佢著住黑色西裝、打起藍色領帶,出現喺當地嘅各大夜店同酒吧。但是就係同一時間,又有一個PSY喺新加坡出席活動。嘩,乜佢0依家勁到識得分身術喇?原來...喺康城嗰個係山寨版嚟0架!今日已有報道,見到呢個老翻PSY蹤影喇。但,呢個老翻,唔係錢國偉喎。
講真,山寨版PSY嘅扲扮真係同正貨有98%似,又係戴著圓形嘅復古眼鏡,要分得出真係唔易,呢個假貨仲要喺康城出入馬蒂奈茲酒店(HotelMartinez)和卡爾頓飯店(CarltonHotel)、接受訪問、跳騎馬舞,仲要周圍黐飲黐食,並跟眾多參加宴會的賓客及名人合照。英國女演員NaomieHarris合照完仲以為自己中咗獎,喺twitter上面「些牙」,點知被眼利嘅網民揭穿,大家先發現已經受騙...
有fans亦喺twitter問呢個男人係乜水,喺新加坡嘅PSY真身先知自己有個「複製人」,於是在個人twitter度回應: 「似乎是有另一個『我』出現在康城...跟他說聲Hi!」 嘩,正版PSY又幾夠風度喎!
其實我哋香港都有個「山寨PSY」錢國偉囉,如果呢三個PSY可以同場兼合照,場面一定超搞笑!
逢周五隨《蘋果日報》附送嘅時尚美容雜誌《add》第四期經已出版,大家仲可以上《add》嘅官網 http://add.appledaily.com睇足本網上版。除咗有陳妍希專訪,仲有好多時裝靚嘢睇!