仲有唔夠3個月就係十‧一中國國慶，18區區議會當然又會大灑金錢，搞唔同慶祝活動盡顯愛國心。大埔區議會今日就開會討論慶祝十‧一活動嘅撥款申請，其中包括涉款約8萬元嘅社區電影欣賞。主辦機構雖然話係合家歡電影欣賞會，但播放嘅竟然係IIB級嘅《戰狼2》，雖然民主派喺會上力陳電影鼓吹暴力，但最終都喺建制派護航下通過咗。

據知今日會上討論嘅包括喺6個社區會堂舉行電影欣賞會，建議播放電影有《戰狼2》、《黃金花》同埋《建國大業》。獨立民主派劉勇威同八方講，6個民主派議員都表明反對，因為《戰狼2》同《黃金花》都係IIB級嘅電影，當中有暴力鏡頭，唔適合喺社區中心做公眾播映，建議抽走項目，先討論其他。

之不過咁，大埔區議會入面建制派佔大多數，雖然民主派議員力陳利害，但建制派都係照樣舉手通過，劉勇威擔心播放有關電影係主張暴力，又認為電影鼓動「雖遠必誅」，同建制派想要嘅國慶主題不合，大嘆建制派只係舉手機器，少少意見都唔肯聽。查實《戰狼2》同《建國大業》呢兩套戲，都係配合中國大國崛起嘅「愛國電影」，試問建制派又點會唔趁機，宣傳愛國思想吖！