由姬嘉鐸（Gal Gadot）主演嘅《神奇女俠》（Wonder Woman）去年全球票房大收逾62億港元，暫定明年11月上映嘅《神奇女俠2》，將由最高薪女導演比蒂珍姬絲（Patty Jenkins）孖住姬嘉鐸發揮女權精神，據知演員陣容已有定案，姬嘉鐸亦為新片作好準備。

《神奇女俠2》背景設於1980年代美蘇冷戰時期，於一次博物館襲擊事件中，扮作博物館員工嘅豹女Cheetah被神奇女俠所救，之後豹女就以此親近神奇女俠圖謀不軌。豹女於DC漫畫中係知名嘅女反派，今次會在《神奇女俠2》中登場，預計會同神奇女俠鬥智鬥力兼鬥性感。

據報導指，片商本來屬意上屆奧斯卡影后愛瑪史東（Emma Stone）扮演豹女，不過愛瑪史東早已推辭演出，繼而斟《最爆伴娘團》（Bridesmaids）及新版《捉鬼敢死隊》女星姬絲汀慧（Kristen Wiig）執二攤頂上，有指姬絲汀慧對角色甚有興趣，導演比蒂珍姬絲近日已確認豹女會由姬絲汀慧飾演。

精選娛聞，喺晒《娛果》
http://fb.com/appledailyent