陳蕊蕊今日喺中環出席眼鏡活動嗰陣，着住短裙仔嘅佢，差啲又中被古惑的反光地板整蠱，好彩地板係黑色先冇走光。

蕊蕊話自己係打底王，連穿晚裝都會打底，所以唔擔心走光：「屋企有幾十條打底褲，咩色、咩花都有，上面反而好簡單，貼膠紙就得。」

咁男友金剛會唔會好緊張你嘅打扮先？蕊蕊笑住踢爆曾經因為走光嘈交：「有一次囉，佢話我影到出嚟好似走光咁，我話唔係我特登0架嘛，可能我仲鬧返佢，所以之後佢都冇講。」

另外，佢隊組合HunterZ八月會演出跳舞勵志電影，仲係做主角添。蕊蕊話0依家忙緊排舞，每日要花半個鐘拉筋，又要學跳舞堂。

有冇做運動鍛鍊下？蕊蕊話都有跑步，仲次次都叫埋金剛：「不過之前跑過一次，我跑兩步又要返轉頭接佢，可能我體能好過佢好多啦。咁佢鍾意打棒球，喺台灣係明星棒球隊，但係香港冇，佢又忙，都冇乜時間做運動。」