自小對電子興趣濃厚，許明順15歲已與同學合資在黃大仙東頭村開電子維修舖，同時銷售插頭、燈膽、光管等小電器。小小年紀便有資本開舖？「我家境唔係好好，不過除咗讀書，可以有多一樣嘢發展，屋企精神上支持，我用儲起嘅利是錢、零用錢開舖。」店舖雖小，但意義重大，因為這裏是他與數位志同道合的同學聚會，研究收音機電子零件的地方。
將課堂所學的電子原理，在維修舖實習，把舊電器拆件研究及維修，任何牌子的電器都難不到許明順，「電視機火牛成幾萬watt，買個新火牛返嚟仲貴過部機，惟有拆出嚟自己整火牛。對線圈、用幾多號線，跟住用人手蹺個新火牛，試阻力，要整成幾個禮拜至一個月。」由於要維修的收音機、電視機增加，加上街坊棄置的舊機，令店舖地方不夠存貨，3年後，許明順在附近開分店，「嗰時全程投入電子，返學『釣魚』，但整電子就好投入。好多機要整，夜晚索性喺舖頭瞓。」

對電子的興趣從未減退，同時對做生意，許明順亦開始積累心得，97年創辦DSC直銷中心，他選擇樓上舖，「街舖要成四萬幾蚊先租得幾百呎，我租嘅樓上舖月租只係6000蚊」，當時投資約10萬元，在旺角開設約600平方呎的傢俬電器舖。
缺乏門面招徠顧客，許明順決定以價格搶灘，他開創直銷方式，「連鎖店經過買手、拆家、批發商、零售商，一層一層成本加到好高，我直接叫總代理送貨，慳返車隊錢。」他教顧客到其他店舖揀選貨品，記錄型號後向他訂貨，「好似廠價係100蚊，一般去到用家要300蚊，但我加維修保養都只賣150蚊。」那豈非利潤微薄？「我打個電話有百幾蚊賺，點解唔做﹖」
對於揀舖，他亦有一番心得，2000年後許明順在屯門開了第一代地舖，但仍不忘往「樓上」發展，「我連埋上層一齊租，平先租。」同一屋苑商場的舖位，他寧選擇位置較偏僻但租金較低的舖位，「我嘅客有目的而嚟，佢哋有腳，就算上20樓都嚟，所以我揀舖位只考慮兩點，就係靜中帶旺、交通方便。」

有生意頭腦，懂得揀舖，並不代表生意一帆風順。許明順指，擴充初期曾遇上大難題，「嗰時由3間發展到5間、7間，公司癱瘓咗，舖開多咗但後勤跟唔上。」原本送貨期為一星期，但延至一個月，部份客人要求退款，「之後改善物流、營運系統，喺運作上改咗好多，家即使做多3倍生意額，都無問題。」

60年代末　開設電器維修店
80年代初　發明「大膽復活器」
80年代中　將有線電視機改裝為無線
80年代末　轉型為電器零售商
97年　成立DSC直銷中心
09年　改名為DSC德爾斯
2011年初　共21間分店

做電子業，除了要有技術，創意及膽識亦不可缺。80年代初，許明順從電子雜誌知悉有新技術，可用高壓打入電子層，維修電視機老化內膽。不過買一台機器逾百萬元，他與朋友自行研發，結果成功研發出「大膽復活器」，憑這在3年內，賺逾20萬元。
80年代中期，由於電視機由有線過渡至無線，許明順將回收來的有線電視機，加上無線接收器出售，收機價數十元，加上維修保養費，他標賣數百元出售。為增加銷路，他更與電器零售店掛鈎，賺得第二桶金。「港九周圍走，喺舖頭同供應商、零售商吹水，識晒佢哋，加上中國開放，電視機需求增加，開始由維修轉做買賣。」這亦是許明順由電子維修，轉營為零售的轉捩點。

除了零售，許明順更涉足製造，當一般連鎖店等供應商提供新產品，他走先人一步，「直接同廠傾，如果量夠大，我哋會搵好零件畀工廠，派埋QC駐廠。好似電視機喺市場賣緊第五代，我哋已經賣到第六、七代。」
許明順還參加世界電子展，了解最新趨勢，「3D電視唔係好適合香港市場，因為香港地方細，咁近睇好容易頭暈。」但用於數碼相片，立體感凸出，可舒服地欣賞照片，他認為可以發展，「做咗四十幾年，倒轉嚟行都識。」
從許明順的經營策略，可見其為人相當實際，事實上，他曾於90年代初打算移民，並為此報讀不同課程，如室內設計、互聯網、金融、股票等，「每個星期讀20個課程，好似因為識設計，親自幫客戶設計屋企，公司個website初頭都係我自己做，家先畀人整。」

金融海嘯掀起零售業結業潮。08年10月，62年老字號泰林電器全線結業，卻為許明順帶來擴充的機遇。

「泰林結業，我接收咗佢大部份員工。我同泰林客路唔同，直銷中心嘅客戶群係中、低檔，泰林係中高檔。原本泰林班高級客會諗我唔係買開cheap嘢，所以我改名，由『DSC直銷中心』改名做『DSC德爾斯』。」「DSC」直譯就是「德爾斯」。
現時DSC德爾斯銷售的品牌，包括大、中、小牌子，但這位電子界老行尊說，「大牌子用幾多錢賣廣告？實際係心理因素，無論乜嘢牌子電器，入口香港嘅手續一樣，要有產品安全認證，一出問題都係要『抄家』。」怎樣打破客戶對名牌的「迷信」，他說：「啲客好精明，電視機人哋賣6000、7000蚊一部機，我賣2000蚊，大牌子都係嗰幾間廠做，你無得抗拒。」

問到快將60歲的許明順如何交棒予幾個子女？「要睇佢哋興趣同能力，唔一定要做呢行，我畀技能佢哋，唔係財富，開發佢哋自己思想。」大女已參與公司工作5年，曾在多個部門工作，「自己教唔到仔女，佢由每個阿頭調配，先做到家。」
話雖如此，但許明順談到子女，仍難掩慈父面容，「見佢喺人哋度做阿四，又無嘢學，不如返嚟，但無親口叫佢返嚟，係佢食飯時自己主動講，做得唔開心……」