曾演出多齣人氣作品嘅新生代女星朴信惠，噚晚事隔兩年再襲港，喺九展舉行「2017 Flower of Angel 亞洲巡迴粉絲見面會」香港站，朴信惠為咗今次見面會都相當花心思，除咗大展歌喉外，更化身劇集《Doctors》嘅醫生角色為粉絲解答煩惱，又親手整飯盒畀粉絲。不過朴信惠前日抵港時被發現左手無名指及尾指包紮住，今次帶傷訪港令粉絲相當擔心，朴信惠亦有喺見面會上解釋：「洗碗時打爛咗隻杯，一時心急用手去執所以割傷咗，不過唔嚴重，醫生都話可以只貼膠布，係我怕受感染先包住。」

朴信惠身穿黑色連身裙獻唱三首歌曲後，就換上另一套衫進行其他環節，同粉絲分享《Doctors》經典情節及拍攝花絮。講到動作戲，朴信惠表示：「雖然現場有替身，但我全部都係親身上陣，當中有一幕係着住高踭鞋拍，所以搞到對腳都好痛，但好滿足。」而現年27歲嘅朴信惠又指《Doctors》可能係最後一次扮學生，及後提到於今年4月因胰腺癌逝世、劇中飾演其嫲嫲嘅資深演員金姈愛時，朴信惠就語帶哽咽：「拍攝時好幸福，會成為我珍貴嘅回憶。」講到同劇集拍檔金來沅嘅吻戲，朴信惠就指自己親生哥哥唔鍾意睇到自己拍吻戲，又突然爆哥哥料話哥哥同女友嗌咗交，相當搞笑。

然後朴信惠就着上醫生袍重演醫生一角，為4名幸運粉絲解答煩惱，並親手寫低解決方法畀粉絲。為粉絲進行心理諮詢後，換上黃色連身裙嘅朴信惠就即席現場整飯盒送畀1名幸運粉絲，當中包括得意飯糰、生果及三文治，雖然朴信惠因為手受傷導致整嘢食嘅速度唔算好快，不過明顯好熟手，似乎都喺屋企有整開嘢食。除咗為粉絲進行心理諮詢及整嘢食冧粉絲外，朴信惠亦準備咗多份禮物送畀幸運粉絲，包括拍攝《Doctors》時着過嘅衫、其有份演出嘅韓片《我的麻煩大佬》光碟、寫真集等。

與粉絲影大合照後，朴信惠就表示：「今次嘅見面會到尾聲喇，今次冇主持人，得我自己一個，所以如果有咩失誤希望大家包容吓。今年秋天將會有新片上映，希望大家繼續支持我。」又用廣東話講「再見」，之後送上中文版《My Dear》。喺粉絲嘅呼喚下朴信惠再現身台前安哥，唱出《愛漫弦》OST《相愛的那一天》為兩小時嘅見面會畫上句號。