九龍西立法會補選，民主派代表姚松炎出唔出到閘仲成疑問，代表建制派出戰嘅民建聯鄭泳舜（胡杏兒個姐夫呢）就喺噚日報名，星光熠熠大把建制人物撐場，近期網上攻勢好凌厲嘅鄭泳舜，facebook直播卻蝦碌收場，呢鋪「傑作」又係多得蔣麗芸好帶挈。

「hello 多謝你啊」

話說當大棚人喺報名地點樓下造勢，為鄭泳舜吶喊助威嘅時候，一直傍實鄭嘅元秋，就被影到拉住鄭提場，而當時民建聯仲用緊個收音咪直播，將元秋教仔對話收錄得清清楚楚，包括同鄭泳舜講：「你一定要笑住對住鏡頭。」鄭就回應：「得嘞，知嘞。」元秋繼而又讚鄭泳舜啲相幾靚，「啲誠意、啲眼神」，舜仔可能唔知點回應，只係笑稱：「多謝Ann姐你過嚟啊！」
其後到民建聯主席李慧琼發言，元秋又再施展佢先係一姐嘅本色，教舜仔：「笑住企喺佢（琼子）隔籬。」其後又再提當時冇乜表情嘅舜仔：「笑吓，笑吓。」到埋位影相時，元秋再次提醒呢位後輩，等陣記者上去前呢，「走埋去攬吓爸爸，呢個動作要做嘅」。舜仔就話「知道，知道」，攬攬佢自細已相當熟悉嘅爸爸，但元秋未收貨，叫鄭泳舜「再攬多次，Ann姐叫你攬多次」，鬼叫你做細呀頂硬上，鄭泳舜惟有尷尬再攬多次，仲同其實一直企佢附近嘅爸爸講：「hello，多謝你啊！」

李八方