初三赤口。應節的朋友，不妨搵人拗吓頸，鬥嘴過初三，讓心血管受點突如其來的良性刺激，可能大利降低新正頭這兩天血糖裏進食過量的蘿蔔糕和油角煎堆的超標膽固醇。
鬥嘴不可馬虎，要搵匹配的對手。這個猴年初三，最佳嗌交對象，是四大護法。
四大，請你高度關注，並非你想當然的「胸大、波大、屋大、人大」。四大護法，霸佔四個方向，像神主牌，鎮守東南西北。無論你用邊個角度，移燈換櫈，點樣洗牌，都係冇得走雞，只要喊一聲「還政於民」，四大護法就會張開法口，大喝閘住。像麻雀友失驚無神截你胡一樣，你被迫收回「還政於民」爆棚的這一鋪，由護法中的「笑壞人」同志搶降，騎住你，食了一鋪一番咁大把。你試諗吓，這種場景，想唔破口大罵都幾難。一破，就開了赤口大運。

嗌交，還要有道具，記得手執鉛筆，高舉近鼻，每嗌一下，就用鉛筆向上剔一下，活像樂團總指揮，指揮棒魔法頂靈，對方很易被你拋窒，怕你一時失手或者失憶，會將鉛筆篤入自己鼻哥窿，錯將鼻屎當魚蛋。
假如你對我的嗌交推許人選不滿意，覺得自己搵，夾過八字，較合心水。我尊重你的民主選擇，拗頸應節，上花果山搵馬騮仔，對住牠的馬騮屁股作八代祖宗開罵，實在頂癮過跟穿西裝、嘴角嘔白泡的人猿型閹人無厘頭齋拗一通。