本地文化界對將成立嘅文化局有好多意見，戲劇大師鍾景輝做主席嘅香港戲劇協會，今個星期一晚喺上環文娛中心舉行集思會，邀請文化人講意見，仲有候任文化局長或特首辦人員到場。
劇評家曲飛日前喺港電台節目接受訪問時，踢爆陳冉當晚遲大到，集思會7點半開始，陳冉9點先現身，「（陳冉）有嚟到，不過非常之準時，遲咗一個半鐘先到」。當晚在場嘅文化人胡恩威，亦證實陳冉遲到。
陳冉到場後聽文化人發言兼做筆記，曲飛認為陳冉唔係幾投入，對候任特首辦失望，「派呢個人嚟係唔恰當，如果咁，佢係許曉暉嘅負資產」。候任特首辦口頭回覆本報書面查詢時表示，「陳冉因有其它公務要做而遲到，佢無乜特別身份（出席集思會），唔係為公事，唔係代表候任特首辦」。至於她為什麼會在現場做筆記，候任特首辦表示不能透露。