點樣先叫做有投資眼光？除咗平買貴賣，更加重要嘅係識睇準時機「撇」！呢排靜到連影都冇埋、相信響到諗緊揀袋巾抑或煲呔嘅李家二少楷楷，又示範一次畀大家睇佢係有先見之明！
話說做獨市生意又有特區政府撐住嘅貿易通TradeLink，噚日發盈利警告，原因係要為旗下OnePort做1000萬元撥備，仲因此要調整派息比率，當日投官府信心一票嘅小股東梗係心噏，因為之前官府賣股，好似盈富同埋地鐵，股民都搵到錢，但呢隻貿易通嘅股價分分鐘會潛水，跌穿招股價。
不過，最冇癮嘅可能係代表政府揸住大股嘅財政司司長，同埋由頭到尾揸住8.12%嘅獅子錢莊！點解咁講？事關原本同獅子錢莊一樣揸住貿易通8.12%嘅電訊盈科，舊年11月頭以每股1.5元清貨離場，係咁易「骨」咗9400萬，當時佢個世紀賣盤deal仲未落幕，證明佢嗰陣仍然幾理智，識邊玩邊「骨」水！
大家又睇睇貿易通個股價，噚日收1.47元，已經同當年招股價1.25元非常貼近，二少眼光好過財爺唔奇（做官嘅財經眼光先天性唔掂），但好過獅子錢莊班賓架就有啲估唔到！

賺少咗　只因當年太早撇

之不過二少成日速食速撇（唔好心邪，只係講投資），都試過令佢賺少咗兼俾人串！好似04年以3.7元上市，𠵱家升到30蚊樓上嘅騰訊（即係發明中文ICQ嗰間），憑住兩隻QQ企鵝起家嘅主席小馬哥馬化騰Pony，當年接受訪問時話，創業之初要錢養住兩隻企鵝，於是搵VC，99年二少檔盈科數碼動力下面個VC，最初都唔夠膽入股，但後尾見人哋IDG入，佢又入110萬美金，但唔夠一年就同IDG一齊賺12倍離場，小馬哥話：如果佢哋今日都未放手，賺嘅絕對唔止咁少……
[email protected]