【新增Sulli裸露戲流出一事】

韓國男神金秀賢事隔4年回歸大銀幕嘅新片《Real》，喺萬眾期待之下，今日正式喺韓國上映。新片日前率先舉行媒體試映會，不過事後媒體嘅評價就好壞參半，甚至有媒體直言「耗資100億韓圜拍攝嘅賭場廣告」，但觀眾對《Real》嘅關注度就極高，目前電影預售率排第一。而新片噚日進行VIP試映會，金秀賢現身戲院發表感想時突然落淚，話新片拍得好辛苦，似乎金秀賢壓力都相當大。

儘管新片預售率排第一，不過觀眾評分卻係目前所有喺韓國上映緊嘅電影中最低分嘅一齣，截至香港時間晏晝1點，觀眾評分只得4.72分(總分10分)。雖然新片不停以金秀賢及Sulli嘅破格床戲為賣點，但觀眾卻甚少批評呢段床戲，反而指責電影剪接上出現極大問題，搞到唔多明個故事講乜，更有觀眾直言「《Real》係金秀賢從影中最差嘅一齣作品」。

而《Real》亦有搵嚟多名藝人客串，當中包括「國民初戀」秀智、「國民妹妹」IU、前女團SISTAR成員多順、前女團Wonder Girls成員昭熙、韓劇《三流之路》男星朴敘俊等，據知秀智於片中飾演金秀賢嘅紋身師傅，更打破清純形象，上半身畫滿紋身並叼住煙亮相，不過就有觀眾表示秀智僅亮相1秒，之後完全被剪接走；至於IU就飾演頒獎台上嘅助手，但只係全景拍攝，根本睇唔清係IU，令觀眾質疑邀請藝人客串嘅目的。

另外，Sulli於片中裸露戲嘅相被非法流出並喺網上瘋傳，對此，《Real》方面表示正了解狀況，如有發現會要求用戶立即刪除相片，會視乎狀況考慮從法律途徑追究。