社民連「阿牛」曾健成為咗爭取政府開放大氣電波，經常要上山裝發射器，原來兒時嘅阿牛，已經成日同一班「童黨」通山跑，最開心就係摘生果食。阿牛屋企一家七口，有一個阿哥同細路同兩個妹妹，雖然家住跑馬地，但佢唔係住豪宅，而係住鐵皮屋，當年政府進行清拆時，已故立法局及市政局議員杜葉錫恩都有幫過佢。

今年60歲嘅阿牛，爸爸係裝修師傅，媽媽係泥水工，佢話11、12歲開始，已用童工身份幫爸爸手做裝修兼學師。阿牛喺培中英文書院中學畢業後，亦踏上裝修呢條路，做咗多年地盤判頭，更曾經參與多個本港重要工程，包括九龍灣、佐敦同柴灣地鐵站，亦曾興建紅館吊起大螢幕嘅大型鋼架；近年入紅館睇小鳳姐演唱會，見到個鋼架至今好穩陣。

阿牛中學畢業後，曾獲一間加拿大大學收取做學生，但由於家境問題，最終無去到，畢業之初其實都做過3個半月旅遊公司，之後先開始地盤生涯，直到89年中共中央政治局常委李鵬將學生民主運動定性為「動亂」後，阿牛決心從政，無再做返老本行。

95港英政府治下，當時仲係民主黨員嘅阿牛成功喺新九組「漁農、礦產、能源及建造界」當選議員，佢話記得當年曾被政府要求證明自己同建築行業有關，獲時任選舉管理委員會主席、現已參選特首嘅胡國興用咗近一分鐘問問題，就成功獲核實身份參選，絕對唔似得宜家參選立法會咁鬼麻煩。