今日大家睇《金手指》前，請你睇咗美財長蓋特納個救銀行計劃先。如果已睇咗，以下就係個計劃嘅問題。
1.救到銀行不過市民一樣冇錢借。之前，孫柏文都講過澳洲前總理基廷話，蓋特納醫病成日斷錯症。97年亞洲金融風暴，代表花旗財政部搞到印尼唔使死都死咗。
呢個計劃，係蓋特納覺得啲平民借唔到錢，原因係銀行手上有太多毒資產，所以銀行唔放債。問題係，信貸收縮係首先因「證券化」系統瓦解，呢個計劃冇幫助。第二就係銀行唔放債，唔係銀行想放債不過冇錢，而係銀行唔覺得啲新債仔有還款能力。
呢個計劃就算塞錢入銀行，市民一樣冇錢借。

救銀行計劃三死穴

2.冇交代拍賣有冇底價。如果拍賣啲問題資產係有賣方定嘅底價，如果買方出價唔夠。銀行一樣好似家咁，有人出價不過唔賣。如果係冇底價，賣方根本連博都慳番，一於唔參與，亦即同家一樣。
3.買方同賣方打籠通。因為買方將可能有高達九成嘅錢由政府出，所以就算天價買會輸自己錢先，賣方銀行可能會場外回佣畀買方基金經理。即再一次搵納稅人笨。仲要因今次計劃毋須國會批准，透明度會極低。
即係點解？即係明益啲銀行啦！葛霖快啲攞美國政府錢排毒，你一話攞，滙控（005）即見70元！
孫柏文
http://phatdat.blogspot.com