近年娛樂版多咗好多有關世界各地影展、電影節嘅報道，原因當然係我哋港產片多咗去參展或者參賽。係唔係代表港產片嘅質素提升咗？見仁見智！電影製作人近年一直掙扎求存，一部電影推出市場之前反應實在難以預料，有時先往世界各大影展走一趟，目的都係希望在外國的影展可以得到一些正面的、有助宣傳的評論，最好就係攞番個獎咁就更加強而有力。
我都好想，但係部份影展會要求參賽電影係未正式公映。所以電影製作人只可以做兩件事，一係配合影展時間表去拍攝，在報名限期前完成，乖乖哋交個copy出嚟，俾班德高望重嘅評審過過目先，然後睇吓啱唔啱佢老人家嘅胃口，再決定你係咪最後入圍嘅十位佳麗，咁當然做得佳麗就梗係有番咁上下質素。一係就拍咗部戲唔好上，等到有影展肯定畀你參加，咁呢個世界咁大，咁多影展，毛里求斯影展或者長春電影節，總之乜都好，最後梗有得參加嘅。最後重有個方法叫「使橫手」，不過我都唔知係點，問吓啲老細至知。

以前冇強大明星陣容嘅戲或者藝術成份好高嘅電影至會跑影展，現在亂晒大龍，乜片都好，總之去賣片都當係。咁你搞party就係鬼佬都會嚟蒲。一定會見到人山人海，娛樂版有張相實冇問題。宣傳部門亦都愈嚟愈傾向咁做，但係搞咁多人又飛機，又酒店，重開party，條數都幾大鑊同浪費。
影展的確係一個平台可令港產片走向世界，但係做導演嘅都要好好考慮電影裏面嘅技巧同內容，如果諗住去討好班鬼佬、鬼妹。咁就真係無謂。