ViuTV《全民造星》導師Eric Kwok（郭偉亮）日前在社交網開post，稱問參賽者 “Raise ur hand if you are not gay!"（如果你不是同性戀者，請舉手）引來關注，直指他不應以性取向當成笑話或呃like。由於該post廣受注目，故昨晚Eric Kwok之將之刪除。

今午Eric Kwok在ig撰長文，解釋事件始末，表示佢當日其實係問咗班參賽者幾個問題，包括：「是否仍是處男？」、「有冇喺fb買like？」、「有冇試過性騷擾其他人？」等等，不過佢就只係拎咗“Raise ur hand if you are not gay!"嚟出Post咁解。Eric Kwok強調自己絕非恐同，亦抱歉今次誤會令人不快。

其後Eric Kwok再接受《蘋果》電話訪問時再稱冤枉，又稱「係應該寫清楚啲，唔係好容易令人誤會成件事」。

Eric Kwok表示：「其實嗰個係教學員點樣對住傳媒應對尖銳問題，例如有冇買票呀、有冇騷擾或者抽水其他啲學員，又或者問姜濤係咪處男。嗰日係同阿芝（卓韻芝）一齊問啲咁震撼嘅問題，主要係想睇吓佢哋有乜嘢反應。咁我今日唔問，遲早都有人問呢啲問題，無論你係基定唔係基，因為大家都將會係公眾人物，所以咪喺呢個情況吓去問。」

「從來都冇諗住係玩，亦唔會攞呢啲嚟玩，因為我有好多基嘅朋友。我喺美國長大，不知幾清楚人權。但係點解會喺呢個場合講？因為我覺得係對班學員有用。」

Eric Kwok稱，當日同學員呢個分享，令佢本人亦留下深刻體驗，所以先至喺社交網分享。咁點解句句都唔share、偏偏只係引述關於同性戀嗰句？他稱：「咁我唔想講太多嘢，只係post咗嗰一句，咪令大家有呢個誤會，令大家覺得我係一個性別岐視，對啲學員唔好，但係其實唔係。我自己都有啲唔好意思，我唔係想令人唔開心，成件事都係for一個騷，想啲學員學到嘢。」

最後Eric Kwok話：「我要多謝嗰啲有抨擊我嘅人，佢哋明白呢啲說話喺某一個場合係有意思，多謝嗰啲人明白我Eric Kwok係唔會攞呢啲嘢嚟開玩笑。」