港股急跌2000點後又再急彈2300多點，波幅大得驚人，少啲心血都唔掂。大升市之下，仍有隻國企H股打入跌幅榜，江西銅業（358）大跌市前突宣佈停牌，噚日復牌難逃一跌命運，一開市已急跌15%，中段一度插落31%，收市仍跌19%，單日波幅勁過唔少三四線股。

根據復牌通告，江西銅業計劃集資收購母公司的銅、金、鉬等相關資產、德興銅礦技術改造、阿富汗和北秘魯海外資源開發、償還金融機構貸款和補充流動資金。連同認股證及可轉換債券，最高集資額達136億元。
由於可換轉債係兌換A股，而江銅A股又較H股貴成2.9倍，所以集資買母公司資產應屬好消息，不過高盛認為是次收購對短期盈利幫助有限。該行指出，收購將增加江銅銅儲量約10.7%，並會提升自有供應比率約0.8個百分點至26%，若以項目貢獻5億元人民幣盈利計算，收購市盈率約為4.3倍，估計可提升江銅今年盈利約11%。
不過，高盛指出，雖然發展海外礦資源有助解決內地資源緊絀的問題，但只會於中期約3至4年才能反映出來，該行給予江銅Ｈ股目標價為14元。呢一刻港股氣氛較差，令資源股都唔易升得起，但係睇長遠啲，美國係咁放水，通脹加美元貶值必會令資源股受捧，江銅仍有候低吸納嘅理由。

噚日個別股仔暴升，除咗神奇股東力實業（978）又再勁升36%之外，勞氏環保（309）升25%，小金庫恒豐金業（870）升24%，合豐集團（2320）升17%，不過睇番圖表呢幾隻股份近日都慘受洗倉之苦而暴跌，噚日急升後只係補番部份跌幅。令人奇怪嘅係噚日竟然都有隻股仔暴跌，筆克遠東（752）勁跌24%，因公佈去年純利僅升8%至1.46億元，盈利增長遜於市場預期。筆克往績PE約10倍，咁都被洗倉，反映股仔仍危機處處。