《蘋果》體育組曾越洋採訪各項大賽，對於體壇近廿多年的港中關係變化感受良多，由回歸前港人義無反顧支持、2002年中國首度出戰世盃、劉翔奪金及北京奧運升至最高峯。到近年因政治氣氛180度轉變，最明顯是2015年港中世盃外大戰掀互罵風波，近年逢播國歌必噓，以及狂賀孫楊停賽等事件油然而生。

曾身兼體育評述員、主持人、撰稿人、作家、體育節目製作人、雜誌創辦人等的馬啟仁（Keyman），點子層出不窮，亦曾是《蘋果》體育專欄作家，《蘋果》創刊25年，他一直捧場，最欣賞本報與時並進，亦與「扶弱」心態有關：「我係買報紙食早餐嘅人，今時今日我只買《蘋果》，睇到佢哋好用心做專題，同社會接軌嘅題材，撐《蘋果》亦同我性格有關，我偏向鋤強扶弱，《蘋果》喺呢個時代屬小眾定位，艱苦經營，我更想支持。」

由學生時期兼職《華僑日報》記者，到1995年正式在有線評述，Keyman那既輕鬆又專業的風格深得球迷歡心；此時期正是他認為中港體育關係第一部曲的「好奇心」，他說：「80至90年初，香港運動水平未到世界級，每逢電視播奧運，好多港人焦點都落喺中國隊，由1984年奧運許海峰奪金『零的突破』，到中國隊強項如體操、跳水都甚具觀賞性，吸引港人眼球，嗰時港人支持中國隊好純粹，覺得香港同中國有關係，對中國隊有一定好奇同好感；就算1985年的5.19世界盃外圍賽，香港以2：1擊敗中國，港人雀躍原因並非贏咗中國，而係睇到香港足球從未如此接近世界盃決賽周。」

1997回歸到2008年北京奧運，展開Keyman口中第二部曲的「甜蜜期」，香港「風之后」李麗珊歷史性奪1996亞特蘭大奧運金牌，一句「香港運動員唔係垃圾」喚醒市民對香港運動員重視，但亦無損港人對中國選手愛戴，Keyman說：「97回歸後，香港人更加接受自己中國人身份，中國隊呢十幾年間嘅成績同運動明星，令港人對佢哋義無反顧咁支持，先係2002年日韓世界盃，中國足球首次打入決賽周，我記得每當中國隊出場，好多人都企起身唱國歌，我哋做節目時都唱；之後到奧運劉翔奪金同NBA嘅姚明，佢哋成績了得外，場外一舉一動都牽引人心；再嚟2008京奧，李寧喺開幕禮半空燃點聖火，令人看得陶醉，我覺得係港人情緒同中國運動最接近時刻。」

他認為第三部曲的「矛盾期」或者「有你冇我」，多少跟政治扯上關係。「中國體育喺京奧後有啲走下坡，呢十幾年中國運動明星少好多，負面新聞多好多，以前港人鍾意中國運動員刻苦特質，依家已很難搵到；足球場上大家對主場作客分得好清，中國足球漸漸唔夠說服力。」Keyman沒說的，還有經過2015年中國有層次海報，令整件事鬧得更僵；最近孫楊服禁藥停賽，港人嗤之以鼻，以上都離不開政治。

-----------------------------

打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
--------------------------------
《體蘋果》陪你睇波講波

https://www.fb.com/appledailysports