當年今日
關於我們

成功改造!中距離馬轉東廐跑短途彈甩贏

蘋果日報 2015/03/29 06:00

成功改造!中距離馬轉東廐跑短途彈甩贏

告東尼剛周六晚有份喺杜拜爭大賽,可惜佢旗下隻短途新貴「幸福指數」飲恨阿喬斯短途錦標,力拼屈居亞軍。賽後告仔聯同其他香港大軍一齊回防,見大摩、苗禮德先後贏馬補數,第八場三班千二米,佢亦有樣學樣,搵何澤堯操刀爆隻9.8倍半冷門「赤龍駒」,連續兩次本地日賽東廐都有馬贏。
「赤龍駒」之前由高伯新訓練贏1600米,1800米則上名,上仗轉東廐初出,先在1400米快放熱身,今仗進一步縮落1200米,後發先至敲響轉倉後勝鼓,何澤堯亦成為繼吳嘉晉、楊明綸同梁家俊之後,今日第四位有頭馬落袋之華將。目前何澤堯、梁家俊各得20win,首席華將地位爭持激烈。
今場跑第二之「寶成福星」係羅理雅座騎,呢位澳洲將由第六場開始「君悅灣」、「車神」、「寶成福星」非冠即亞,三、四名分別係韋紀力之「共創輝煌」同梁家俊之「真好漢」。