早前因為醉駕被捕嘅愛華頓前鋒朗尼，星期一已經上庭認罪，佢被判停牌兩年同埋100小時社會服務令，今次事件最終可能令佢付出接近50萬鎊（約528萬港元）代價。

英國《太陽報》報道，31歲嘅朗尼因為今次醉駕畀球會愛華頓罰咗兩星期人工，總共係32萬鎊，由於佢畀法庭判罰停牌兩年，可能要花12萬鎊請司機，每星期至少四次載佢由佢間價值2,000萬鎊嘅豪宅來回拖肥嘅Finch Farm訓練場，仲有去做100小時社會服務都可能要用到司機。愛華頓方面冇打算幫朗尼畀任何來回屋企同球會嘅交通費，所以佢因為今次醉駕隨時要付出高達50萬鎊代價。