當年今日
關於我們

【回應祖名判刑】叫成龍要撐住 阿倫:要睇住阿嬌!

蘋果日報 2015/01/09 06:00

蘋果房祖名譚詠麟回應即時世姪

房祖名今日判刑六個月,最快可以情人節前出返嚟,祖名呢個判決全城熱話,而樂壇校長譚詠麟(阿倫),今晚出席港台頒獎禮時,對於祖名判決一事,佢話今朝一早已經起身睇。

問到判刑係咪合適?佢話:「有佢法制,最緊要當事人知錯。(點睇祖名返出嚟工作?)呢啲好難講,但我對佢有信心,祖名係一個好好嘅細路仔,出道時候已好識分尊卑,阿嬌(林鳳嬌)教得佢好好。不過之後識乜嘢朋友,各人有各人際遇,我亦唔方便講太多。」

阿倫又話日前成龍出席佢派對,佢當晚曾對成龍講:「任何嘢都好,屋企發生事,要撐住,要頂住,唔冧得,同埋媽咪(阿嬌)都好辛苦,呢件事影響佢(林鳳嬌)好多,係咩嘢事唔方便同你哋講。」

問到係咪成龍唔開心,所以要鼓勵佢?佢話:「我拉埋佢一邊講,作為父母,點會開心吖?但係記住,一定唔係世界末日,等佢出嚟慢慢教。同埋我叫佢要硬淨,要睇住阿嬌(林鳳嬌),佢唔冧得,佢係硬漢。」

咁成龍當晚點答阿倫?佢話:「佢(成龍)叫我幫手睇住。」若祖名出嚟時,有機會的話,會否向佢訓話?阿倫說:「有機會一定會,佢係世姪。」