今日係陳百強（Danny）60歲冥壽，除了樂迷對這位偶像十分念掛，一班歌手對Danny同樣念念不忘，露雲娜、何超儀、陳奕迅、鄭秀文、關淑怡、溫拿、楊千嬅等等，談到對Danny嘅印象，離不開斯文、有品味，當然還有他留下來的歌曲。

露雲娜10多歲已認識Danny，佢話大家有好多話題，最常談嘅話題係音樂。佢話：「電影佢都鍾意，有時又會帶我去買靚衫，又成日請我食漢堡包， 我想同佢講『 Danny 我好掛住你』。」何超儀因為家姐同Danny老友鬼鬼，從小視對方為契爺，有次畀家姐鬧唔好好打扮，Danny主動提出做佢stylish，陪佢去中環買衫，超儀話：「我第一次演出，佢仲搵咗陳華幗造咗一套好靚嘅衫，所以我好錫呢個契爺。」

草蜢三子視Danny係超級偶像，希望Danny喺上天開開心心，同以前一樣笑容燦爛。Sammi鄭秀文就覺得Danny嘅歌好能勉勵人心，衣著方面佢就話：「以前無『潮』呢個形容詞，佢可以話係好有品味。」

環球唱片推出紀念Danny唱片，關淑怡（Shirley）重唱《漣漪》，原來Shirley第一次遇見Danny是讀書時期，Danny去她學校取景拍攝，她在遠距離見到對方，覺得佢官仔骨骨、風度翩翩。

楊千嬅就話Danny嘅歌全部識唱，最鍾意偏門《凝望》、《夢裏人》。千嬅又話：「佢係好有型嘅才子，音樂才華非常高；今年有間唱片公司邀請我，出一隻Danny嘅紀念大碟，我揀咗《夢裏人》，歌詞好romantic，嗰種romantic令到自己如果我真係遇到一個Danny就正。

麥嘉當年跟Danny在電影《聖誕快樂》合作，佢話︰「佢離開呢個世界亦無憾，因為佢嘅劇本，要佢嚟呢個世界，就要光光彩彩。佢做完呢啲嘢，選擇呢個方式，離開呢個世界其實冇問題，好似移民火星咁，總之佢快樂就得，佢在天之靈，佢都係一粒星呢嘅。」