校長譚詠麟今日率領麥家瑜、李幸倪及符致逸等宣傳新碟《音樂夏令型》，以香港大球場作起點，乘坐開篷巴士走訪中環、銅鑼灣及尖沙嘴等多個地方巡唱。

今日氣溫高達三十度，加上陽光普照，眾人熱到不停流汗，自言大汗的校長笑謂：「以前都試過喺巴士唱，不過咁熱就未試過，25歲後生仔頂得住嘅。不過我底褲都濕埋，一次性嗰啲用咗一打，仲有好多，送埋畀佢哋（其他歌手），送埋畀你哋（記者）都得。」

校長指唱片公司環球是次不惜工本支持，非常大手筆：「未計晒條數，不過一定有七位數字。我哋成個製作宣傳去到年底，會逐首歌宣傳，六首歌都有MV，最後會串連成一個故事。導演好好，自己碌咗人情卡，揾咗好多出名嘅artist客串，但係邊個就未講得住。」曾經在大球場開騷被指音量過大的校長，這次在大球場旁作起點，他笑謂：「今次喺側邊，可以盡情唱，呢啲音量唔會（投訴）。」

談到周日將舉行的反《逃犯條例》遊行，問校長會否上街支持？他說：「呢啲咁政冶性問題，留返啲政冶人物答，我有留意新聞。」至於對惡法有何看法？他說：「國有國法，家有家規，好多嘢都係睇下環境嘅啫。」

另外，麥家瑜和李幸倪笑言未有「濕身」，李幸倪說：「而家盡量保持平靜心情，仲未係好熱，但係過多15分鐘就唔知啦。」校長笑指是地獄式巡唱，李幸倪指平日跟校長吃好東西，這次當還債。麥家瑜表示與校長合唱的《某月某日會OK》已推出MV：「校長頭先問我有無睇到個MV，佢話我搞喊佢。」

-----------------------------
新聞有價 你肯為《蘋果動新聞》付幾多錢?
https://hk.adai.ly/QDTT6y5mgX
--------------------------------
【記住63836568】全民爆相爆片！下一個爆料王就係你
https://bit.ly/2Guolu9